|
كبل التلفزيون نفس الشي يمكن مرتين او ثلاث اضطريت اغيره لين صفيت على نوعية جيده
لابد ايضا تحديد مكان التلفزيون وياحبذا لو يكون هناك فيش للتلفزيون موزعة في اكثر من مكان وذلك من باب الاحتياط |
كذلك من الضروري تمديد وايرات الكبل من النوع الزين
احد المشاكل الي واجهتها هو ردائة الكبل المستخدم .. مثلا عند دينمة الماء وصلت كبل من النوع العادي مع كثرة الاستخدام اشتعل الكبل واضطريت اخذ واحد ثاني يستحمل الاشتغال مدة اطول ومايسخن |
غلطت يوم خليت باب الحوش في وجه باب الصالة فضيحة مكشوفين. |
تسوي الجبس وتصبغة بصبغ ابيض عازل للماء ( واتر بروف ) وانا مسويه من سنين ولاتغير |
البيت مقابل جهة الغرب وذبحتنا شمس الظهر وتكمل عليها شمس العصرمن الحرالبيت مولع. |
اكبر خطأ في بيتي الباب اللي تحت الدرج ماسويت حساب الدرج وصار ارتفاع الباب صغير والواحد لما يدخل لازم يدنع شوي |
اخطاء اسمع الوالد دائما يكررها في بيتنا ..
بلاكونات البيت جدا كبيره .. لا يوجد باب خارجي يستطيع الواحد الركوب اليه .. للذهاب للسطح وعليه المرور من الداخل .. هناك بعض غرف النوم في الطابق العلوي .. على شكل حرف اليو باللغه الانجليزيه u اي الشخص الذي تقع غرفته في النص محبوس .. المجلس يقع امام منظر خلاب .. اما صاله البيت عكس ذلك .. لا توجد غرفه للسائق ويكون مدخلها من الشارع ..( لذلك استغنينا عن السائق ) لا توجد غرفه في السطح للخادمه .. |
من الاخطأء في البنيان اني ماعملت حساب اني ممكن اركب وحدات تكييف سبيلت يونيت ، وبالتالي اضطريت اركب بالصالة والمطعم كسرت الطوفة وصار شكل الهوز برع البيت مو حلو لانه امتد للسطح
|
هناك ايضا خطا يقع فيه الكثير ..بالنسبة للمجلس الخارجي بعض الناس تخلي الحمام اعزكم الله
خارج المجلس .. يعني الي يبي يروح الحمام لازم يطلع من المجلس ويروح للحمام .. ويكون الحمام حااار ورطوبه ومغبر اغلب الوقت ياحبذا لو يكون باب الحمام في زاوية او في اخر المجلس بحيث لايظطر الضيف الى الخروج من المجلس لدخول الحمام ويكون مكيف او على الاقل يصل الهواء البارد للحمام |
من الاخطاء اللي الواحد ممكن يسويها فالبيت ... غرفة طعام ...
الواحد لازم يفكر في مكان لتناول الطعام لأهل البيت ... وتكون هذي الغرفة مجهزة بتلفزيون .... واحسن شي لو تكون بجانب المطبخ الخارجي ... عشان ريحة الاكل .... وتكون الغرفة هي المقعد اليومي لأفراد الاسرة ... |
من الأخطاء الغير متوقعه والتي عانيت منها هو السيراميك او البورسلان بكل انواعه الارضي او الحائط وذلك في حال تركيبه عليكم بالضرب عليه اليوم الثاني بأخذ كذا عينه وان اصدر صوت فجوه فهذا يدل على تكسره او خروجه في ايام معدوده وعليه يجب على المقاول في الحال تغيره او تكسيرة وستبداله وأن راح المقاول وخذا احسابه فطلب العوض من الله والله يعينك على تبليط من جد وجديد
|
من الاخطاء اللي طاح فيهاا واحد من الربع انه سوه غرفة النوم الماستر فوق غرفة الالعاب مالت اليهال
عاد وانت شوف الازعاج والدوشة اللي يسونها والتطقطق اللي مايخلي الواحد ينام |
من خلال التجربة في منزلي اشوف ان الmitsubishi افضلهم من جميع النواحي خصوصا الصيانة و التعامل و الاداء بحيث ان الاعطال تكاد تكون معدومة و الحمدلله بفضل الصيانة الشهرية للمصعد من قبل الشركة 0
* يفضل ان يكون اختيارك للشركة قبل عمل الخرائط و الشروع في البناء لأن كل حجم مصعد يحتاج الى مقياس و عمق معين عند الحفر و عمل الخرسانات و ذلك عن طريقة زيارة مقر شركة المصاعد مع مهندسك الاستشاري و اخذ جميع المقاسات قبل البدء في عمل الرسومات الهندسية 0 * نصيحة في حال اختيارك للمصعد الافضل ان تختار مصعد حجم 8 اشخاص اوسع و اشرح لك خصوصا انك ستقوم بعمل ديكورات داخلية للمصعد فكل هذا سيأخذ حيز بعد التنفيذ 0 * طريقة اختيار المصعد من الداخل ستكون عبارة عن خيارات موجوده عند الشركة و كل خيار له سعر معين يزيد و يقل حسب نوعية اختيارك 0 * اذا رغبت بعمل ارضية رخام للمصعد من الداخل فيجب ابلاغ شركة المصاعد قبل التصنيع لان الارضية اللي يركب عليها الرخام تكون مختلفة عن الارضية العادية 0 * يفضل عمل درج خارجي للمنزل لعمال المصعد لتفادي دخولهم المتكرر كل شهر لعمل الصيانه0 * غرفة المصعد فوق السطح يفضل ان تكون مكيفة للتبريد على مكينة المصعد هذا على حسب طلب مهندس المصاعد 0 لا تترد بتركيب الاجود حتى لو كان السعر غالي شوي |
انا عندي درابزين الدرج حديد وفيه تشكيلة ورود من الداخل اذكر ان ولدي الصغير الله يحفظة دخل راسة في فتحات الحديد وجلست دقيقتين لين قدرت اطلع راسة وبعدها على طوول جبت تبع الدرابزين وركب لي مثل لوح بلاستيكي على حديد الدرج من الداخل عشان ماتكرر السالفة معايالسالفة مرة ثانية
|
وضع لوح البلاستيك قد يشوه منظر الدرابزين ....
احسن حل قد يكون في النقشه والتشكيله نفسها .... لما تختار التشكيلة ... احرص على ان تكون المساحات فالتشكيله ... صغيرة ... يعني مايكون فيها فراغ كبير... وواسع ... بحيث ما يقدر الياهل يدخل راسه ... |
اول شي بخصوص دينمة المنزل (برشر الماي )
من قبل كم يوم صار عندي التماس بسبب ان الدينمة مكشوفة .. لهذا عند تمديد الكهرباء لدينمة البيت لابد التاكد انها مغطية تماما وان الماء لايصل الى الدينمة وحتى الشمس ايضا |
شغله ثانية وهي ليتات الداخلية للبيت
عندي كذا ليت نيون داخل البيت والمعروف ان هالليت مكشوف .. صراحة هالنوع من الليتات اثب فشله في المطر لهذا لابد اخذ الحيطة والحذر واختيار اللمبات الي تكون ضد المطر |
شغله اخيرة
لابد التاكد من ان التمديدات الي على سور البيت وغيره من التمديدات الكهرباء الخارجية لايصلها المطر يعني تكون مغطية تماما .. خصوصا لمبات سور البيت |
موضوع توزيع فيشات الكهربا في جميع انحاء البيت
امر مهم جداً ,, لتجنب تمديد الوايرات بشكل يخرب على المنظر الجمالي للبيت . |
توزييع الفيش الكهرباء والتلفون والتلفزيون ايضا اكثر البيوت حاليا مايحطون اعتبار لتمديدات الدش وصراحة شكل الواير لما يكون ممدود من السطح مو حلو كلش لابد الواحد يحط باعتباره ان يعمل تمديدات للدش ويستخدم افضل انواع الكيابل لان الكيابل بعضه له عمر افتراضي سنة وبعضة سنتين وبعضه 10 سنوات ولابد يكون في مجال لتبديل الكيبل وتغيره بكيبل اخر |
نصيحة لكل مقبل على البناء ..
مراجعة الخرائط الهندسية بشكل تفصيلي مع مهندس مختص .. يعني خرايط الكهرباء مع مهندس كهربائي ويتم مراجعة التفاصيل والحمل الكهربائي وغيره من امور مهمة .. خرايط الصرف ايضا .. وتكون هذي الخرايط قبل البدء بالبناء بدل مايقعد المقاول ويسوي اللي على كيفه وخصوصا ان المصمم او المكتب الاستشاري عادة يكون مسوي شغل لمجرد الحصول على رخصة وبيع الخرايط وتكون خرائط اولية بحاجة الى عدة مراجعات .. |
لما تسوي الخريطه وتروح حق مهندس الكهرباء يقولك وين تبيني وهو بيسويلك شغل اي كلام عشان يخلص بس وانت وزع بكثرا في كل مكان سواكت الكهرب وتلفون وتلفزيون وخاصه المكيفات حط في كذا مكان يمكن لك رغبه تغير مكان المكيف قبل تسكن واهم شي الكيبل الي داخل شوف له مكان صاد لاتخليهم على كيفهم
|
ارتفاع جميع الأبواب لازم يكون أكثر من مترين وانا أفضل مترين ونص حد أدنى لإرتفاعها |
اهم شي توزيع الإضاءة صح لو فيها تكلفه عاليه لانك مراح تخسر وافضل اليتات هي نوع الفيليبس الهولندي لان عمرها طويل
|
يمكن تجيك حاله نفسي تبي ترفع مستوى البيت الدور الارضي وتسير مشكله عندك في الدرج يسير عالي وصعب الركب الدور الثاني لاني مسوي رتفاع 4.85 م وقبل كان 4م الافضل مايتعدا 4.20م
|
انتبه من تركيب الالمنيوم الدرايش شيك عليهم لازم يحطون الفوم بين الالمنيوم والطوفه ويسكره بسليكون عشان الغبار مايدخل عليك لو نلحض الغرف مسكره ويجينا غبار يدخل علينا ماندري من وين ويفضل انك ماتركب الدرايش السحاب
|
فريم البيبان بعد نفس الطريقه يحطلك فوم بينه وبين الطوفه عشان الارضه وحراره ماتخرب في مقاس البيبان مرات نلحض بعد فتره طويله الباب مايسكر عدل تحس انه يبيله حك والبيبان حاول انك تخذ قطه كامله خشب لان اكثرهم يجبون البيبان كذا قطعه ويلزقونها وينصبغ ومايبين عليه الى بعد فتره تسير فيه تشققات
|
الخلاط يعني الولفات ومغاسل عليك بجوده عاليه لانها مستهلكه واجد |
وحاول انك توفر في البنيان اذا انت على قدك لان التشطيب يكل اقل شي نفس قيمه العضم البلستر |
واذا تبي تبني بيت ارضي فوق 400 متر تراه مكلف يعني يعني لو تبني فله من200 الين 250 م بيطلع اقل تكلفه لان المقاول يستانس اذا الدور الارضي كبير لانه فيها خرسنات اكثر واعمده على قولتهم هذي هي الكيك الفايده فيها اكثر
|
افضل الملاحق (المطبخ الخارجي والمخزن وغرفة الخادمة ....الخ) انها تكون مشبوكة بالبيت عشان ما تكشف هذا اولا وعشان تستغل المساحة فوقها في البنيان..
|
افضل احسب حساب تركيب المصعد مستقبلا حتى لو ماتم تركيبه في الوقت الحالي ومتى ما الواحد احتاج بعدين يركبه يركب..
|
بالنسبة للبرك ما افضلها بتاتا .. الا لوكان فيه مساحة كافية ويكون سكان البيت من الكبار ..
|
بالنسبة لشكل الدائري لبعض الصالات اعتقد انها مزعجة شوي في اختيار شكل الأثاث والستائر ممكن يتحول شكلها لدائري مضلع .
|
مراعاة ان يكون المطبخ مواجها للجنوب للتقليل من كمية الروائح الداخلة للمنزل .. |
مراعاة وجود مصادر جيدة للتهوية الطبيعية للغرف والصالات والتقليل من الشبابيك المواجهة لجهة الشمال . |
احد الاخطاء الي اكتشفتها من كم يوم هو عدم وجود استور في البيت
ضروري يا اخوان يكون هناك استور داخلي وكذلك استور خارجي الاستور الخارجي يكون مغطى ومرتب لوضع الاشياء الكبيرة ..ويكون تقدر تقفله اما الاستور الداخلي فهو لاشياء استهلاكية مثل السكاريب والبكرات والوايرات وغيرها |
للي يبي يسوي حمام عربي للدور الأول
يجب عليه ان يخبر الإستشاري بأن يسقط أرضية الحمام على الأقل 40 سم حتى لا يرفع مستوى بلاط الحمام او يعمل الحمام العربي على ارتفاع 20 سم و هذا الإسقاط تكون في الخرائط حتى يتم تنفيذه بلشكل الصحيح |
المجلس الخارجي والملحق الخارجي
لم انتبه لارتفاعات الارتفاع 2 متر و 75 سم يجب ان يكون الارتفاع اكثر من 3 متر |
يجب عليك ان تحدد ماذا تريد ان تركب من انواع من المكيفات
مكيف شباك او مكيف سبليت مكيف شباك على الخرائط سمك واير الكهرباء 4 ملم مكيف سبليت على الخرائط سمك واير الكهرباء 6 ملم |
| الساعة الآن 08:09 PM. |
Powered by vBulletin® Version 3.8.4, Copyright ©2000 - 2025, Jelsoft Enterprises Ltd. TranZ By
Almuhajir
F.T.G.Y 3.0 BY: D-sAb.NeT © 2011
HêĽм √ 3.1 BY: ! ωαнαм ! © 2010