استشارة للتأسيس في أعمال السباكة
 

السلام عليكم ورحمة الله وبركاته..

في مراحلة التأسيس لأعمال السباكة نريد تركيب
-جاكوزي
-الكراسي الافرنجية المعلقة
-المغاسل المخفية (المعلقة)
-الدش المخفي
-الكرسي العربي (أفضل طريقة لعملية الصرف هل يكون صندوق الصرف مخفي أو توجد طرق اخرى)

وحسب افادة السباك والمختصين من الافضل الاختيار واتخاذ القرار في الوقت الحالي وذلك لاختلاف المقاسات والنوعيات!!

ما هي الماركات التي تنصحوننا بها ؟
وأين نجد هذه المحلات سواء في الرياض أو القصيم؟
نأمل الرد في أقرب وقت وجزاكم الله خيرا

وعليكم السلام ..

بالتوفيق ان شاء الله ..
قبل كل شيء .. الله الله بالسباك الكويس ..
احتمال تطيحون في واحد ما عمره اشتغل الاشياء اللي تبونها وجالس يتعلم عليكم .. وبالتالي بيحوس شغلكم كله ..

بالنسبط للكراسي المعلقة .. يبي لكم تختارون الصندوق (السيفون) وتعطون السباك خبر .. ولا تنسون تذكرونه بانه يحط محبس للماء اللي يعبي السيفون.. وفيه ماركات كثيره للصناديق المخفيه .. لكن انا ما حبيت اغامر واخذ شيء غير قروهي

الكراسي يفضل تختارونها من الآن واحرصوا تاخذون طريقة تركيبها .. يطبعونها لك في ورقه يعلمك بالضبط ارتفاعها والطول والعرض

المغاسل والدش المخفي .. يبي لكم تروحون لأي شركة خلاطات موية (سارا .. نجم اباحسين .. الدوسري .. اميريكان ستاندردز .. الخ من المحلات الموجوده على التخصصي) وتشترون منه القلب حق الخلاط عشان يركبه السباك ويمدد له

المغاسل المعلقة يبي لكم تبلغون السباك انه يحط المسافة بين محبس المويه البارده والحارة قليله (ان كاني منيب واهم اقل من 10 سم) عشان ما تطلع الليات برا


بالنسبة للكرسي العربي .. اذا ملزمين عليه .. افضّل يكون السيفون حقه عباره عن ماصورة زي السيفون المرفق في الصورة

الماركات تعتمد بشكل اساسي على الميزانية ..
عندك كوهلر (وكيله النجراني) .. امريكان ستاندردز (الغامدي) .. فولري ان بوخ (سارا).. كوتو وَ توتو (نجم اباحسين) .. الدوسري عنده ماركه مدر يوش هي
فيه نوعية تركية كويسه نازله في الاسواق اشكالها جميلة جداً بس ميب رخيصه ..

في الرياض عندك طريق التخصصي .. فيه كل اللي تبينه ..

ماقصرت أخوي amdady

أنا حاليا في نفس المرحلة وتعبت عشان الاقي سباك كويس

ودي أسألك عن Head shower أو الدش الساقط من الأعلى وعادة يكون في السقف

كيف طريقة تركيبه ؟

سيفون الكرسي المعلق هل يتم تكسير الجدار وغرسه داخله أم يبرز للخارج ؟

وشكرا

العفو وانا اخوك ما سويت شيء .. الواحد وده يفيد و يستفيد..
هذا يا طويل العمر والسلامة يفضل الخلاط يكون مخفي عشان يضفي جمالية على الموضوع ..
يمد السباك خط على فوق للرين شور .. ويطلعه من الجدار الجانبي بحيث يكون بين السقف والجبس ..
ولابد تثبيته في السقف .. بمشكبيات لان الرين شور ثقيل .. ما تسوى عليك وانت تهوجس تتروش يطيح فوق راسك..

سيفون الكرسي بالنسبة لي يعتمد عليك بشكل اساسي انت وش تبيه ..
تبيه في صندوق .. والا تبيه في الجدار ..
اللي سويته في بيتي ..
اي حمام سيفونه بيكون على الجدار الخارجي للفله ثبته على الجدار .. وبنيت جنبه ببلك 10 سم ..
لاني ما ابي أأثر على العزل حق البيت..

والحمامات اللي على جدران داخليه .. كسرت لها في الجدار

يعطيك العافية اخوي

لو بغيت اسوي زي الي في الصورة هل يلزم شراء الادوات من الآن ؟

مثل المفتاح أو القلب

http://www.me.kohler.com/onlinecatal...4/aaa23708.jpg

كل الشكر والتقدير أخي/ amdady
على هذا التوضيح وجزاك الله خيرا ونسأل الله لكم التوفيق

1- لنا تساؤل عند اعتماد تركيب الكرسي المعلق مع السيفون المخفي فمن الافضل أن يكون ايضا السيفون مخفي للكرسي العربي حيث وجدنا في السوق السيفون المخفي من شركة جروهي متوفر للكرسي الإفرنجي والعربي

2-نقطة أخرى ما هي مقاسات التأسيس المناسبة للجاكوزي لشخصين في مساحة 2.50 × 2.80 والذي يوفر خيارات متعددة عند التركيب سواء كان بشكل زاوية أو مستطيل

حسب خبرتي البسيطة :)
بداية يجب اختيار شركة معروفة ذات جودة عالية لتفادي التكسير مستقبلا لا قدر الله..
على سبيل المثال جروهي..
وفي الوقت الحالي أنت بحاجة لشراء القلب للخلاط الذي سيتم زرعه في الجدار
وأما بالنسبة لمفتاح الخلاط يمكن شراؤه لاحقا عند التشطيب ويفضل من نفس الشركة
وأما بالنسبة لسماعة الدش أيضا يمكن شراؤه لاحقا عند التشطيب ولك الخيار من نفس الشركة أو من شركات أخرى تركب عليها

ويمكن يفيدونك الخبراء أكثر في هذا المجال
بالتوفيق

شكرا لك freenokia

الي اعرفه أن القلب يأتي مع المفتاح كله في كرتون واحد والا هالنوع مختلف ؟

سلام ..
مثل ما تفضل اخوي freenokia

في مرحلة العظم .. اللي تسويه انك تزرع القلب فقط ..

حط في بالك وانا اخوك .. اذا اخذت القلب قروهي .. معناتها المسكه حقته بتصير قروهي ..
والظاهراغلب الشركات تسوي كذا ..
بس بالنسيبة للسماعه والرين شور تقدر تحط اللي تبي.
ولازم تعرف كم خط تزرعه في الجدار ..
فيه ناس تبي خطين بس (رين شور و سماعة) تحتاج قلب خطين سعره من قروهي بحدود ال 450 ريال
فيه ناس تبيه 3 خطوط (رين شور و سماعه و حنفية) في الحالة ذي يبي لك قلبين

غالبا القلب يكون مع الخلاط الخارجي وهذا الي سار معي بأغلب القطع واشتريتها كلها قبل التأسيس الحمد لله وهذا من عيوب التأسيس المخفي لكن الشكل الخارجي يشفع له
والله الموفق