كلمات صاحب السمو الملكي الامير عبدالرحمن بن مساعد

ادلهــمّ الكــون حــولي و اطْبقـَت سحب الكــآبة
أغرقـَت جوفي بدمعي واهلـَكـَــت أخضر حقولي
وينكــــم ياربع عمــري ؟ من بقى ما صك بابه؟
مابقى لي صاحبٍ أرمــــي عليه اهــْــوَن حمولي
الكتابة عن همـــــومي ذنب أفْشَـل في ارتكابه
هكذا حـــزني أناني ... غير فرْحــــــي للّي حولي
من همــــــوم الناس أبني دافعي لجل الكتابه
ما حسَبْت حساب ضاقـوْ بْما كتبت او صفّقوا لي
كم كتبـت و قيل تكفـا ... هذا شـي ما ينحكـابه
مو بكيفي صرت وابِل تُرتَقب لحظة هطــــــــولي
ما تعبت ارقى و أرقى .... بالدُّعــــا حالي تشــــابه
مقدر انزِل لو أبنزل ... غصب ترقــــابي رجولي
لي إلهٍ جلّ شــــانه عندْ ما اكون فْـ رِحــــابه
في ركوعـــي في سجـــودي أصْعَد فْـ قِمّة نزولي
لي مكانٍ في الكواكب .... ذا طموحـــــي لسْتُ آبَه
نجم عالي ... ذا مكــاني .. عل موتي هـــو أفـــولي
باقيٍ يا دنيا شعــري يمـــلئك فخر و مهــــابه
قـــــد يزول فْـ يـــوم آتي عنــدما أنتي تزولي
إنتسبت لْـجَـد مُعْجِز ... دين و عزوم وصــــلابه
هو أخو نوره معَزّي ... تبطــي جــــداً يا ذُبولي
و لي أبــو ما شفت مثْلـَه مُحتسِب مهما أصابه
كل زهدٍ غير زُهْدَه مُفْتَعَـــلْ وَهْمــِـي و صــولي
عندي امٍّ مستحيلــه طيبهــا صعب اجتنابه
آه يُمّه كــم أحبّك في شرايينــي تجــولي
و لي وطــن أحيا لعـزّه أفتـــدي ذرّة ترابـــه
مسلم سعودي عروبي .. ذي فروعي ذي أصولي
ولي شقيقٍ ماني اقـــوى نبرة الحــزن فْـ عتابه
كيف عاد ان كان يزعل ؟ أحترق من فرط هُـــولي
ولي ولد عمٍ غمَرني فضله و سِرْت فْـ رِكــابه
شفت له في كل لحظــه فزْعه و موقف رجــولي
و لي حبيبه مستديمه حُــب عمــري من شبابه
ما لي فصول و مواسم وَحْــدَها هي بس فصولي
أم قلبيــنٍ بجـــوفي هـم بعـد كل القــرابه
هم سبب سعدي و مجدي هم سبب خوفي و جفولي
ما فعلت الخيـــر أرجــي من بشر فــاني إثــابه
عالمٍ ربّي بقصــدي و ما سبَبْ أطيب فعـولي
أربعيــنٍ من تجــارب .... أربعينٍ من غـــرابه
أربعينٍ من تأمُّــل شكّلــت ذاتـــي و ميـــولي
الكِبِــر أردى الخطــــايا ما تجبّـه إستتــابه
أستعيذ بربّي منّه في خروجــي في دخــولي
كلّ احَـــد يقضي حيــاته بين تقصير و إنـابه
يستحيل انّك تلاقي ... لاْيّ اْحَد وصفٍ شمـــولي
شفت في الدنيا مهــازل تُفقِد المدرِك صوابه
يفخر الكــــافر بكفره ... تُشْتَم بْقولة " أصولي "
النفاق اكبر رموزه كـــان في عهد الصحـــابه
كيف عـــاد الوقت هذا ..؟ كل شبرٍ به " سلولي "
الرضـوخ أصبح فضيله و قول " لا " أصبح دُعــابه
و المشاكــل مبتدعها قال : تِلْزِمْكــُم حلــــولي
بين تفريــط و تطـرّف تـاه جيلي في خِطـــابه
خير اموري هو وَسَطْـــهَا ... طال عن هذا غفولي
إحترس يا ذيب و احذر من زمن ســـادَت كلابه
الوفــا بَه صار عِجْبـه .. و الغدر فعـــلٍ بطولي
لا تثـق بالّلي تثــق به ... بـد شكّـــك و ارتيـابه
كم عُهُـرْ سافِرْ يُغطّى بْملْمَــحٍ طاهـــر طفولي
عندي للدنيــا ســؤال و ما أبـي منها إجــابه
هو يغيّر شي رفضــي .. أو حيادي .. أو قبولي ؟
كـن يا دنيــا همومـــك جُمِّعَت مثــل الذّيــابه
سالـَمَت كل الّلي قبلي .. تنتظـر لحظة وصــــولي
كلّ غــدرك ما يســاوي في مـوازيني ذبــابه
ربّمــا لـوّك وفيتـي ... كان أرّقْنـي ذهـولي
يا عذولي هاك بوحي هاك جرحـي و انسكـابه
ما سوى ذا وقت ســانح ... قم بدورك يا عذولي
أتعبتني هالقصيده .. فكـر و جـروح و رتابه
بس يا هذي القصيده .. أقصريها لا تطــولي
يا كـريم يحـب عَفْـوهْ رحمِتَـه تسبق عـذابه
ألطـف بـ ذلّي أمامـك حينمـا يَحْتُـمْ مثــولي


لمسة فنون