مخطط ارض 25*25 للأهميه
 

مساكم الله بالخير جميعاً
لايخفى على الجميع مايقدمه الاخوان في هذا المنتدى من نصائح وتوجيهات للمبتدئين ، لذلك ارجو من ذوي الخبره ان يساعدوني في ايجاد مخطط لإرض مساحتها 625 واطوالها هي 25*25. بحيث تكون متوسطه ويكون فيها درج داخلي ودرج جانبي ويكون تصميها الخارجي ممتاز .
اتمنى من الجميع المساعده وشاكراً تعاونكم مقدماً ...

وين اهل الخبره والفزعه

اخ ماجد
المنتدى للاستشارة وليس لتصميم
انصحك اولا عدم البناء في منتصف الارض ابن في زاوية بحيث تستفيد من الحوش في جهتين
ولك عدة خيارات ممكن فيلا وشقق جانبية ممكن فله وشقه مسروقه او فيلا فقط
ممكن تكتب في قوقل مخطط فيلا وتختار وضع فيلا وتشاهدالتصاميم او الذهاب للفلل القايمة في بلدتك او زيارة المكاتب الهندسيه والاطلاع على المخططات

الله يعطيك العافيه ابولمار بس انا حبيت احدى من الاخوان يعطيني تصميم عشان اشوفه واعدل فيه ، واشكرلك ردك الجميل .

هلا أخوي ماجد
إذا تبي نصيحتي
رح لمكتب هندسي وعطه احتياجك ورغباتك
يعني مثلا تعطيه نوع التفصيل اللي تبيه أبي دور ارضي وشقتين وملحق
أو درج داخلي وشقتين .. اللي تبيه
ثم تعطيه احتياجك من المجالس .. مجلس رجال .. تبي مجلس نساء أو لا .. تبي مقلط أو لا . تبي مطبخين وإلا مطبخ .. تبي صالة كبيرة أو متوسطة . الدرج الداخلي دائري أو مربع ..
تبي غرفة الشغالة والغسيل والمستودع تحت وإلا فوق
تبي غرف نوم تحت وإلا ما تبي ..
وتعلمه اذا عندك طلبات خاصة من قرب أو بعد المجالس من بعضها في ربطها مع بعض أو بعدها
ثم
كم غرفة نوم تبي فوق وهل تناسب عدد أفراد الاسرة .. حمامات داخلية أو مشتركة .. تبي صالة أو كتشن فوق أو لا ..
هل ناوي تستثمر بالشقة اللي فوق أو لا ..

كل هذي الأمور واحتياجاتك تجلس أنت وأفراد أسرتك وتدرسونها وش اللي تبون وش الضروري من غير الضروري وهل تحب كثر الغرف مع مساحات ضيقة أو تقليل الغرف مع مساحات شرحة
وما المناسب لكم .. وهل المناسبات والعزايم عندكم كثير أو قليل وتسجل كل شيء في ورقة
وتروح لأحد المكاتب الهندسية المحترمة اللي ماعندها نسخ ولصق أو يجيب لك تصميم شخص يختلف عنك في الظروف والعدد والاحتياج والمزاج ويقول لك شف هذا التصميم وعدل عليه
هذا خطأ ..

المكتب اللي يحترم نفسه يأخذ منك طلباتك ورغباتك ويترجمها إلى تصميم يخدم رغبتك ويوظف المساحات ويوزعها على احتياجك ومزاجك
طبعاً غالباً هالنوعية من المكاتب سعرها أغلى من غيرها لأنهم يشتغلون على المخطط والرسم والتنفيذ .. ولو أنهم ينسخون ويلصقون كان لقيتهم أرخص . ولا تستخسر أن تدفع أزود قليلا لتحصل على تصميمك المناسب .. فأنت تبني بيتك بمئات الالوف فلا تستخسر زيادة الفين أو ثلاثة على مرحلة من أهم مراحل البناء وهي التصميم
لكن بعض المكاتب الله يهديه يبالغ مره في السعر عشان الاسم

وأنا الحمدلله سويت جولة على عدد من المكاتب الهندسية وشفت طريقتهم وأسعارهم
ووجدت مكتب سعره جداً معقول بناء على شغلهم
مكتب ماعنده نسخ ولصق .. ولايعطيك تصميم غيرك ويقول أعدلك عليه
يجلس معك مهندس معماري شاطر يأخذ رغباتك واحتياجك ويقترح عليك بعض الاقتراحات ويفتح عليك أفكار احيانا تعجبك وتوظيف المساحات عندهم حلو و تعاملهم راقي جدا .
بعد ما تعطيه الاحتياج يواعدك تجيه يرسم لك نموذجين كلهم يخدمون احتياجك .. تختار واحد منهم ثم تبدأ تعدل عليه إذا عندك تعديلات أو تغيير ..
وفي هذه المرحلة مرحلة التعديل بإمكانك إستشارة الإخوان هنا في المنتدى بطرح أرائهم وتعديلاتهم حول مخططك وإن شاء الله ما يقصرون
والله يسهل لنا ولكم الأمر .
واسف على الاطالة