أول مبروك عليكم البيت ، ثانياً تتهنون فيه إن شاء الله .... أنا قبل كم شهر كنت زيكم أحوس واناظر شمال ويمين والحمدلله استقريت على مخطط عجبني ...

بعطيك عدة نصايح وحطيها في راسك .... اذا بغيتيها فكان بها واذا ما بغيتيها فأنتي صاحبة الرأي الأول والأخير

1. البيت بيتك ... خططيه لك انتي وزوجك وعيالك .... ما عليك من سالفة ضيوف ومدري ايش ، حنا ما بنينا علشان الضيوف حنا نبني علشان نستانس ببيتنا وبالتالي ... أنا مقتنع في شغلكم في عدم إضافة مقلط.

2 المخطط روعة صراحه من ناحية كون الصالة تفتح على الجهة الأمامية للبيت ، بيعطي منظر رائع للصالة من الداخل.

3 المطبخ لا تحطينه تشخصين فيه ، ترى نشوفها في الأفلام لكن غير مستعمل ، يعني بالافلام نشوف مطابخهم بالصالة لأنهم ما يطبخون ، بتحطين مطبخين ، يعني بدينا في سالفة نحط البيت للآخرين ونحط مطبخ نشخص فيه وفي الارتداد مطبخ صغير نطبخ به ، أنا ضد هالموضوع تماماً.

4 أنا أشك في المقاسات الخاصة بالمخطط تقولين إنه اربع مئة متر .. بس شكل المخطط أكبر بكثير من الاربع مية متر ، أتوقع فيه خطأ ما ، فيا ليت تعطيني أطوال البيت بالضبط ، ويا ليت تخلين المهندس يضيف الأطوال على المخطط لأني صراحه اشك فيها.

5 وين المدينة اللي بتحطون فيه هالبيت ؟

6 ما فكرتوا في ملحق تحطونه ؟ أشوف ما في ملحق.

7 ليه حاطين غرف نوم تحت في الأرضي ؟ وكيف مخططين اللي فوق ؟ أنتم هل هو دورين ولا دور واحد ولا كيف ؟

8 الباب اللي ناحية الجدار يسار المخطط المفروض تقفلونه ما لها داعي كثرة الأبواب ، وبيكون مكانه حلو جداً لجلسه عربية مثلاً

9 الحمام حاشرينه حشر في مكان ما أعتقد بيناسبه إطلاقاً

10 من الواضح إنه بتكون تقسيمة الدور الثاني مختلفه عن الأول وبالتالي بيكون هردي البيت كله وبهالشكل راح يكلفكم كثير سواء حديد او خرسانه ، يعني وانتي تخططين للدور الأرضي فكري بالعلوي أو الثاني وخوذيه في الاعتبار.

11 أنا شايف إنكم ما أستفدتوا من الإرتدادات نهائياً ، المفروض تاخذون شوي منها.

12 الصالة كبيرة ومفتوحه والمطبخ وغرفة الاكل ، هذي تتوقعين كم مكيف سبيلت تحتاجونه علشان يبرد أجوائكم ؟ حبيت احط في بالك هالأمر ، ميزانية الصالة فقط تكييف تحتاج لوضعها في عين الاعتبار وإلا ستصبح حاره سواء في عدد المكيفات أو الفواتير الشهرية.

في النهاية ... الفكرة الأساسية للبيت رائعه وجميله وتحتاج الى تأني وتفكير أكثر وأكثر ، وعرضه على أصحابكم والمختصين وكل من شفتوه ، اللي يعجبكم خوذوا في رايه واللي ما يعجبكم برضه قولوا له شكراً ، المهم عدم الإستعجال ابداً.